ماغنوليا بيكري ارسل لنا دعوة لزيارة فرعهم الجديد في المهبولة
في مجمع ليفيلز
طبعا ماغنوليا مخبز مشهور للكيك والحلويات من نيويورك
ومشهور بالريد فيلفيت كب كيك
يبيلة زياره لفرعهم الجديد
مشكورين عالكب كيك والدعوة :)
94969281 / 22270285
محل روشكا للكاكاو والهدايا والتوزيعات
ارسل لنا دعوة لزيارته واخذ فكره عن الشغلات المتوفره بالمحل
المحل فيه انواع من الكاكاو والتوزيعات يتم تصميمها على ذوق الزبون
وهذي بعض اللقطات من المحل
وعطونا نقصة من كاكاوهم
محلهم في منطقة حولي بجانب مستشفى دار الشفا
وارقامهم للاستفسار
00965-94959964
00965-22627575
مشكورين عالدعوة والكاكاو
مطعم صني سايد اب من اول المطاعم اللي زرناها ببداية مدونتنا
كان المطعم بالنسبه لنا من ألذ المطاعم وكان يقدم اطباق امريكية متنوعه بالمباركية
زرناه اكثر من مره وكتبنا راينا بكل زياره
والحين في سنه ٢٠١٥ غير مكانه وفتح له مطعم يديد في برج التجارية
وغير الكونسبت مال المطعم من امريكي الى اكل كويتي راقي
والشيف اللي سوت الاطباق للمطعم هي اسماء البحر
زرنا المطعم قبل يومين الديكور والتقديم راقي جدا
رحنا مجموعة كبيره لان صاحب المطعم بلغنا ان راح ينزل لنا كل اطباق المطعم لتجربتها
وكانت الزياره ذواقة من كل طبق قفشه عشان نجرب كل الاطباق
بدينا بالسلطات
سلطة الجرجير
معاها قطع شمندر وخوخ وصلصة البلسميك
لذييذه جدا شخصيا احب اي شي فيه بلسميك انصح فيها
سلطة جبنة الماعز
عجينه بف باستري حاشينها بجبنة الماعز والسلطة عليها شرايح باذنجان مقلي مع صلصتهم عجيييبه
انصح فيها بعد
سلطة الكينوا بصلصة التوت
ربيان مقلي بالبقسمات
كرات المشروم
كل كره عباره عن مشرومة عملاقه داخلها جبن بانواعه لذييذه
ماك اند شييز
كرات المعكرونه بالجبن مع صلصه مثل صلصه البينك باستا
حلوه وايد
مسقعة باذنجان
بالجبن والطماط واللحم المفروم كانت حلوه بعد
كفتة بالبطاط المهروس
الكفته معاها فستق طعمها كان عادي مافيه شي مميز
دجاج بالعسل
الطبق جيد بس الدجاج شوي يابس
مسخن الدجاج
يمدحون الطبق
باستا بالزعفران
فيها قطع دجاج ومشروم ومتروسه زعفران
هالطبق كان غريب شوي طعم الزعفران طاغي
باستا السبانخ
لذيييييذه جدا فيها كرات بطاط ومترووووسه جبنه والصلصه لونها اخضر فستقي عجيييبه
لازم تجربونها
والحين ندخل بالاطباق الرئيسية واللي كانت احلى اطباق بالمطعم
مجبوس اللحم
اللحم اللي يستخدمونه لحم عربي ودايما يحطون قطعة الموزه
العيش انديا غيت لذيييذ
والزعفران واضح طعمه بالاكل والبهارات المستخدمة من البحرين
نوعين دقوس بالصحن دقوس اصفر ودقوس احمر والمعبوج لذيييذ مع الدهن العداني على الجنب
يعني الطبق اللي واصل لنا عالطاوله من افخر المكونات
صج لذييييذ
مشوي الجدر
هامور في قاعته التقديم عجيب والريحه خنيينه والطعم خياااال مافيه اي زفره وفريش
لذيييييذ
اييبون لكم الجدر ويقلبونه جدامكم حاطة فيديو عنه في حسابي الانستغرام
مموش ربيان جامبو
كل ربيانه اشكبرها والتتبيله والبهارات لذييييذه
خووووش مموش
مجبوس دجاج
الدياية مخلية من العظم بس عظمه الرجل الموجودة
مع نوعين الدقوس الاصفر والاحمر مع المعبوج بنتي حبته وايد
المطعم يقدم اكل كويتي بس على مستوى عالي
اجود المكونات واحلى تقديم وواضح من طعمه الكواليتي
القعدة والمكان راقي والخدمة ممتازه
حبيت المطعم اليديد لصني سايد اب
اكثر الاطباق اللي حبيناها اهي الاطباق الرئيسية العيوش كانت المميزه
والسلطات حلوه وبعض اطباق المقبلات لذيذة ماتتطوف
وباستا السبانخ لازم تنطلب كل مره نروح له
المطعم الى الان في الافتتاح التجريبي وجاري اضافه اطباق زيادة
مكانهم في برج التجارية في الدور الارضي
22463431
كل الشكرعالدعوة اللذيذة
رابط تجاربي السابقة فيه بالمطعم السابق
قبل جم يوم تم افتتاح مطعم البرغر الامريكي من امريكا
ذا برغر جوينت في الكويت بمجمع الافينيوز
حضرنا افتتاحه وجربنا اكلهم
برغر امريكي وهوت دوغ والبطاط المقلي بانواعه مع الميلك شيك
والمميز بالمطعم اضافه اطباق الحلو اللي يحبها الكويتيين
مثل الوافل والكريب بالحشوات و المغرقه بالكاكاو
نظام الطلب مثل المطاعم الامريكيه من الكاونتر
لكن تقديم الاكل بالاطباق السيراميك وليس بالاطباق الورقية
The Burger
البرغر الكلاسيك للمطعم
الطعم لذيذ والصمونه لينه حلوه
وقطعه اللحم كبيره راهية
كانت ناشفه شوي نسيت اطلبها ميديوم ويل
Grilled Chicken
صمونه الدجاج المشوي بالجبن
وايد لذيذه وصلصتها مميزه
Triple D
طلبتها طلب خاص بدون صمون وبداله الخس
لو كارب تفيد اللي يبي يخفف الكاربس او اللي ماشي على نظام اتكنز
فيها قطعه برغر لحم مع بيكون بقري وبيضه مقليه وجبن
لذيذه وتشبع
وجبه الاطفال قطعتين برغر سلايدر بالجبن
وايد حبوه اليهال
بطاط بصلصه الجبن
حلقات البصل لذيذه
واحلى شي الختام مع اطباق الحلو
كريب البراوني
داخلها براوني ومغرقه بالكاكاو عذاااااب
مارشميلو ستك طلب اليهال
BGR Waffle
وافلز بالكاكاو مع فراوله وموز
لذيييييذ لذييييذ
المطعم مكانه مميز مقابل السينما بالافينيوز
تطلع من الفيلم وتتعشى برغر سريع وتختمها بالوافلز المغرقه بالكاكاو
شخصيا يكفيني احلي بالمطعم بدون عشى :)
كافي اخذ فراوله ستك بالكاكاو وامشي :)
كل الشكر عالدعوه قروب ديفا وذا برغر جوينت
حليب وهيل من الكافيهات المشهورة بالكويت
اللي تقدم المشروبات والحلويات الكويتية
طرشوا لنا كيكة القرص العقيلي الخنينة بمناسبه افتتاح مخبزهم الجديد
(في مجمع عبدالوهاب بالسالمية (غاليريا ٢٠٠٠ سابقا
الكيكة خنييينه ولذيذة
وهذا تلفونهم لتوصيل الطلبات للمنزل
25721749
وعندهم فروع في المباركية والافينيوز وذا غيت مول
مشكورين عالقرص عقيلي الخنين
حضرت اول يوم من مهرجان المباركية الثاني
الداعم للانشطة الشبابية
المهرجان يضم عدد كبير من المشاركين على ٣ فترات
من ١ فبراير الى ٩ فبراير ٢٠١٥ في سوق المباركية
من ٤ العصر لي ١٠ مساءا يوميا
ماعدا الجمعه والسبت من ١٢ الظهر لي ١٠ مساءا
ما شاء الله الحضور قوي وكان المهرجان زحمه
واحلى شي الجو خياااالي بارد حلو والتمشي باجواء المباركية
وهذي بعض اللقطات اللي قدرت اصورها
كل الشكر عالدعوة
مهرجان المباركية السنه اللي فاتت ٢٠١٤
وصلتني دعوة من ادارة مجمع اي مول
وزرته بالامس في افتتاحه الرسمي
المجمع عباره عن محل واحد كبير فيه اقسام مختلفه
مثل طريقه دبنهامز وهارفي نيكولز وبلومنغ ديل داخله عده ماركات مع بعض
المجمع فيه ركن ازياء الماركات مثل رالف لورين ولاكوست
وركن رياضه مثل نايكي وسكيتشرز وركن مكياج وعطور بماركات عالميه
وركن يوريكا للالكترونيات
عندهم بعد مطاعم متنوعه لبناني وتركي وعالمي
من المطاعم اللي داخله
زيت وزعتر وكشري بايتس وسيميت سراي التركي واي كلوب
ومن الكافيهات
كافيه سوبريم وكافيه نستله وشيكيتا فروت بار ومسز فيلدز كوكيز وشوكليت كوزين
في اعلى طابق عندهم نادي رياضي للنساء وقسم اخر للرجال
وعندهم ركن للاطفال والالعاب وتسلق الجدار
ومتوفره مواقف كثيره بالسرداب
موجود المجمع في منطقة حولي مقابل مركز سلطان حولي
اذا مار منطقة حولي ممكن تمر المجمع وتستمع بالخدمات اللي يقدمونها
بالامس حضرت افتتاح مجمع اي مول الرسمي
ودعونا لتجربة مطعهم اي كلوب
المطعم يقدم اطباق عالمية متنوعه تناسب ذوق الكل
امريكي ياباني صيني ايطالي
واحلى ميزه فيه هي طريقه الطلب على الشاشه الموجودة على طاولتنا
الطاولة كلها جنها ايباد كبييير
صوب كل كرسي موجوده القائمه ويختار كل شخص طلبه بنفسه واي تعديل ممكن تختاره بنفسك
تختار الطبق وتسحبه وترميه بالمربع اللي بنص الطاوله
واخر شي تشوف طلباتك واسعارها وترسل طلبك للمطبخ
حبيت هالخاصيه لان مايحتاج ننطر الغرسون ياخذ الطلب
وبعد ماوصلت الاطباق حبينا نطلب مشروب زياده ماتعطلنا ومانطرنا الغرسون فتحنا الشاشه وضفنا اللي نبيه زياده وماحب الظلمة اثناء الاكل
ولما خلصنا ضغطنا على زر الفاتوره
شوربة مشروم كانت لذيذه
شوربة ميزو بالربيان
مكعبات الباذنجان الكرسبي
لذييييذ هالطبق لازم تطلبونه للي يحب البيديان المقلي
ربيان تي ان تي
ربيان سبايسي لذيذ لذيذ وكل حبه جامبو
اجنحه دجاج
سلطة سيزر بالربيان
وايد حلوه وكرسبي وفريش
طعم السيزر المعتاد
ستيك انغوس تيندرلوين
كان وااايد حلو وترف
تجربة الطلب بالمطعم وايد حلوه نطلب اللي نبيه بسهوله وبدون تعطيل
وشاشة الطاوله فيها العاب وفيديوات ممكن تلعب فيها علما يوصل طلبك
لكن جو المطعم مظلم باضاءه زرقه بالنسبه لي احب اشوف الاكل واضح بالاضاءه العادية
وسعره يعتبر غالي
تبدا اطباق المقبلات من ٣ دنانير وطالع
موجود اي كلوب في مجمع اي مول
في حولي مجابل مركز سلطان حولي
مشكورين عالدعوة
شوكو بايتس يايبين من فرنسا
كاكاو ترافلز بنكهات جديدة
جربت من عندهم ٦ انواع جديدة
كل الانواع نفس الشكل لكن الطعم غير عن بعض
الست نكهات اهي
الساده والكابشينو واللوز والبندق والتوفي المملح وقطع الكاكاو
الرييييحه خيااال وانا افتح العلب ودي تشمونها معاي :)
الكاكاو ناااعم يذوووب كريمي دسم شوي
هذا اهو الترافلز بشكل مختصر:)
حبيت نوع البندق والتوفي المملح اكثر شي
الكاكاو فخم وراقي للتقديم
وطعمه وااايد لذيذ وغني وسعره معقول جدا
مصنوع في فرنسا
ووكيله بالكويت شوكو بايتس
وهذا رقمهم للطلب والتوصيل
60691884
كل الشكر عالكاكاو اللذيذ
Filed under: Home Business, sweets 
عصير دكتور جوس يحتفل بالعيد الوطني
ومنزل تشكيلة عصاير على الوان علم الكويت
٤ نكهات
ليمون بالنعناع وتوت اسود وفراولة وبيذان
حبيت البيذان اكثر شي عجييييب
حجم العلب ميني بحجم ١٥٠ مل
حلو حق يوم اليمعة في العيد الوطني
يوصل بآيس بوكس متروس ثلج
عندهم فرعين واحد بالشعب البحري بجانب نادي فليكس
والثاني في العارضية
وعندهم توصيل للمنازل
فرع الشعب البحري : 97581113-22633838
فرع العارضية : 96981700
مشكورين على مشاركتنا الاحتفال
لجنة ساعد اخاك المسلم ارسلت لنا دعوة لحضور السوق الخيري
كويت الخير
يوم الاثنين ١٦ مارس الى الاربعاء ١٨ مارس
في فندق الشيراتون من ١٠ صباحا لي ١٠ مساءا
كل الشكر عالدعوة والتارت
في زيارتي الاخيرة ل لندن
حبيت اشارككم بعض الاطباق والمطاعم اللي جربتها اهناك وتقيمي عليها اذا تسوى تزورونها
جربت محل الايس كريم في هارودز موجود بالطابق الثاني مقابل مطعم البيتزا
عندهم عده طاولات حوالي ٨ طاولات
وكراسي عاليه على البار طبعا بس يقدمون الايس كريم بانواعه
سعر اطباقهم الايس كريم تتراوح بين ال١٥ باوند لي ٢٠ باوند
وفي كل طبق كمية كبيره من الايس كريم تكفي شخصين الى ٣ اشخاص
حلو المكان اللي عالبار تشوفهم واهم يحضرون لك الايس كريم بكل الخطوات
من اختيار الماعون الى التزيين جدامك
اخترنا كوب البراوني
فيه كره ايس كريم كاكاو وكره ايس كريم كراميل
مع ايس كريم فانيليا ماكينه
والبراوني والبسكوت والكريمه للتزيين
مع صلصه كاكاو الفدج الحاره على جنب
الصراحة اختيار موفق وكان طعمه لذيذ
عندهم اشكال مختلفه من اكواب الايس كريم بعضها يحطون فيه دخان النايتروجين
اللي يزور هارودز لندن جربوا عندهم طبق الايس كريم وايد حلو
في الطابق الثاني
جربت كافية غوديفا في هارودز لندن
وايد ناس يمدحونه وان الكافيه لذيذ
لكن للاسف تجربتي معاه كانت فاشله
الكافيه كبير ويقدم تشكيله كاكاو وكيك وكريب
Godiva Tourbillon Warm Chocolate Fondant
اخترنا كيكة الفوندات
للاسف ماقريت انها دارك شوكليت لذلك كان الكاكاو فيها مر
وكانت ناشفه مافيها اي صلصه سايحة بس دخاان يطلع منها بدون اي صلصه
مبين ان طابخينها زيادة
الطبق فاشل بس كلينا الايس كريم
Classic Fondue
كلاسيك فوندو
ايي كاكاو سايح معاه فراولة وموز ومارشميلو وقطع كرواسون
الكاكاو مااااي خفيييف وطعمه ماله شغل بكاكاو غوديفا
ماحبينا طعمه
ماكلناه حتى استغربت الغرسونة لما شالت الطبق تقول شنو شباعى
الا الطبق ماينوكل مو شباعى :)
مانصح فيه
Hot Chocolixir
الهوت شوكليت كان لذيذ جدا
الشي الوحيد اللي طلبناه كان حلو
انصح فيه
للاسف اختيارنا للاطباق ماكان موفق
ممكن بالمرات القادمة نختار شغلات ثانية افضل
مكان كافيه غوديفا في هارودز لندن
الطابق الثاني
محل شوكو روزيز فاجئني ببوكيه ورد وكاكاو راقي
الستاند الاكريليك فكرته وايد حلوه ومميزه
مع اماكن وضع الكاكاو فيه ممكن استخدمه للمستقبل بعد
كل الشكر عالبوكيه الراقي
للي حاب يطلب منه للوالده او للاصدقاء
هذا رقمهم
51154481
وهذا حسابهم الانستغرام
مخبز ومطعم برنسي او برنشي في لندن
امدحه لي احد المتابعين في الانستغرام ان يقدم بيتزا لذيذه
مرينا بجانبه في ليله وكان المطعم زززحمه وكل واحد بالمطعم طالب بيتزا خاصه فيه ماكو سالفه مشاركه بالبيتزا :)
قلنا نروح نتعشى بمكان ثاني ونرد له يوم ثاني
عاد مريناه فتره المغرب وكان جانب الكيك والحلو متروس ناس وجانب البيتزا فاضي
طريقته اهو مخبز وعارض الحلويات كلها وتختار اللي تبيه وفي طاولات بجانب الحلو
اما اللي يبي بيتزا في طاولات بالجانب الاخر بجانب فرن البيتزا
البيتزا عندهم انواع واخترنا بيتزا الموزريلا
اطرافها متينه وبالنص ضعيفه طعم صلصه الطماط والجبن وايد حلوه حبيتها
بس الباقي حسوها عادية موذاك الزود
عجينه البيتزا نفس طريقة الخبز الايراني
كوسا مقلية
كانت وااايد لذيذه تتبيلتها بالليمون حااامضة
مخبز ومطعم برنسي يقدم منيو ريوق وغدا وعشا
موجود في سوهو لندن ممكن تبحثون عنه بالغوغل ماب باسم
Princi
ارسلوا لي معجزة الشفاء عسل اللجين الخاص من السدر
بزجاجة فاخرة وحجمها كبير
العسل من نوع في اي بي لجودته وفوايده
لون العسل بني غامق بس مع اضاءه التصوير طالع افتح لكن بالطبيعة اهو غامق
وثقيل وايد تحس انه اصلي والطعم وايد لذيذ
مع العسل كان فيه كتيب كامل يشرح فوايدة ومميزاته ومن اللي قريته باختصار
ان عسل اللجين الفي اي بي فيه غذاء ملكات النحل والعكبر
العكبر او البروبوليس بالانجليزي للي حاب يبحث عن فوايده اهي مادة صمغية يجمعها النحل من الاشجار ويستخدمها في الحفاظ على خليته من البكتيريا والفيروسات
من بعض فوايد هذا العسل تنشيط الذاكرة والتركيز ولنظارة البشرة وزيادة المناعة
وشكل علبته فاخر ومميز للاهداء
كل الشكر عالعسل الفي اي بي
اللي حاب يطلب من معجزة الشفاء
25644888
Filed under: Food, Health, sweets Tagged: honey, lujain, mujeza, vip, خاص, سدر, طبيعي, عسل 
وجبة الريوق صعب اني اكلها بالمطاعم ايام الدوامات
وفرصة اني في اجازتي السنوية حبيت اجرب طبق كراميل فورد من مطعم برايم اند توست التابع لمركز سلطان
اللي دايما يحطون صوره بالانستغرام
ويعتبر طبق مشهور بالانستغرام لذلك لازم اجربه بنفسي
اول شي طلبنا الهوت شوكليت والشاي
طلبت بيض البنيديكت مع جبن وتركي
وطلبتها تكون رني يعني نص استوا
كان طبق البيض موفق لذيذ
الفرينش توست بالكراميل
ترررف وذايب ولذيذ
بس حلو زياده كان المفروض نطلب الصلصه على جنب
واحنا نتحكم بالكمية افضل من ان تكون غرقانه كراميل
اخييرا طبق الكراميل فورد اللي خلاني اكل بالمطعم
كان عااااادي
طبقات كيك ضعيفه بينها قيمر ببسكوت دايجستف وصلصه كراميل وايس كريم
توقعت يكون الطبق وااااو لكن للاسف كان جدا عادي
يعني ما اطلبه المره القادمه وكان الفرنش توست الذ منه وممكن الواحد يحلي فيه بدل الفورد
تريقت في برايم اند توست فرع البدع الحلو فيه مفتوح ٢٤ ساعة طول الاسبوع
منيو الريوق كبييييره في انواع مختلفه من البيض يمكن اكثر من ٣٠ طبق متنوع
ممكن ازوره بالمستقبل لاطباق الريوق
لكن مو للكراميل فورد
22253131
@primetoast
لما كنت في لندن قبل اسبوعين
متابعين الانستغرام انصحوني اني اجرب شيزكيك من فندق غروفنور التابع لفنادق ماريوت
وهذا الشيزكيك يعتبر الاشهر والافضل في لندن وفي ريفيوات كثيره عنه بالنت
شرينا منهم حبتين واخذناهم سفري
السعر يعتبر غالي شوي الوحدة ب ١٢ باوند
الشيزكيك مغطى بالبسكوت الحالي هش ولذيذ
والشيزكيك يذوووب وناااعم مثل الزبده
وفوقها طبقة كريمة حامضة اول مره اجرب شيزكيك معاها كريمة حامضه
كانت الشيز كيك وااايد لذيذه تسوى الواحد يجربها ويتعنالها
حجمها كبر كف اليد تقريبا
الحبه الوحدة تكفي شخصين
اللي حاب يجربها في لندن
Grosvenor House موجودة في فندق
التابع لفنادق جي دبليو ماريوت بجانب الهايد بارك
راسلوني شركة فايف ستريبس لتجربه منتجهم
فايف ستريبس اهو مشروع متخصص بالكورن فليكس والحبوب والميوزلي الاورغانيك
فكرتهم وايد حلوه وصحيه
انك تختار مكونات الكورن فليكس الخاص فيك عن طريق موقعهم من ٦٠ مكون موجود
بخطوات جدا سهله وواضحه
المكونات كلها اوغانيك طبيعيه مافيها اي سكر صناعي او ماده صناعيه ومن افضل المكونات بالعالم مثل ماقريت بموقعهم
والفاكهه المجففه عندهم يجففونها بطريقة التجميد مثل اللي تستخدم لاكل رواد الفضاء و تنتج فاكهه مجففه محافظه على فيتاميناتها وطعمها
شكل علبهم اسطوانيه حبيت شكلهم وتشيل حوالي ٥٠٠ غرام من الكورن فليكس
كان هذا اختياري الشخصي للكورن فليكس
اخترت كل المكونات اللي احبها مثل الكاكاو
بس كاكاوهم دارك وصحي
للاختيار عده خطوات اول خطوه تختار الكورن فليكس الرئيسي اللي راح تكون الكميه الاكبر من العلبه
وبعدها تختار انواع مختلفه من الحبوب اللي تحب اضافتها للكورن فليكس الرئيسي
وبعدها تختار المكسرات والفاكهه المجففه واخر شي انواع مختلفه من الكاكاو الدارك الصحي
بعد اختيار كل المكونات تسمي الكورن فليكس الخاص فيك
وسميته كيفي ميكس وله رقم خاص كل ما ابي اطلب نفس المكس احط هذا الرقم ويرسلون لي نفسه
ومكتوبه عليه كل المكونات اللي طلبتها
كان كيفي مكس موفق وحبيييته وايد
لذيذ وبنفس الوقت ماحس بتأنيب الضمير لان ادري ان صحي وارغانيك
وما احتاج اني اضيف له اي سكر
ممكن تحطون معاه حليب او روب او مع فروزن يوغرت بعد :)
وعندهم بعد خلطات جاهزة للي محتار شنو يختار
وارسلولي خلطتهم البيري فنان
ميوزلي التوت
فيها انواع التوت مع الفراوله مجففه مع حب شمسي وحبوب مختلفه
حبيت الكينوا بف كان يشوق بالاكل لازم تجربون اضافه الكينوا بخلطتكم
كان لذيذ المكس لكن يحتاج اضافه سكر او عسل مع الحليب
طبعا كيفي ميكس حبيته اكثر من البيري ميكس لاني احب الكاكاو
استمتعت وانا اختار كل مكونات الكورن فليكس
الصراحه مشروع وااايد حلو وصحي
والحين بعد ما جربته ماعتقد راح اخذ الكورن فليكس الجاهز بالجمعيات فيه صنف واحد بس
الموقع حاليا يوصل للكويت وقريبا لدول الخليج
هذا موقعهم للي حاب يصنع الكورن فليكس الصحي الخاص فيه
اشكركم عالتجربه الحلوة فكره مميزه ولذيذه وصحية
مطعم برغر اند كرك من المطاعم الجديدة
المطعم جمع بين البرغر الامريكي والجباتي والكرك الهندي
ارسلولي دعوه لاختيار مكونات صمونه البرغر وتسميتها باسم البلوق
كيفي برغر في منيوهم
جربنا بطاطهم
الانيمال فرايز
بطاط وصلصه المطعم الخاصه
طعمها كتشب ومايونيز ومعاها قطع مخلل
وايد حلو البطاط حبيته مع الصلصه لاني اصلا اكل بطاطي دايما جذي مع كتشب ومايونيز
سنغل برغر
كيفي برغر
اخترت يكون فيها مشروم وجبن وبيكون وبصل مكرمل
طلبتها بدون صلصه لكن حطولها بنفسهم
جربنا الجباتي بالجبن
الجباتي مال المطعم غير عن اللي متعوده عليه من الهندي
الجباتي مالهم اعتبره خبز صاج
جباتي كندر او بالنسبه لي صاج كندر
كرك
كركهم وااايد حلو ولذيذ
المطعم يقدم ريوق انواع جباتي او صاج بحشوات مختلفه وغدا وعشا برغر
حبيت عندهم البطاط والكرك
وعطينا بعض الملاحظات لاصحاب المطعم
مطعم برغر وكرك موجود في اعلى طابق بمجمع ذا غيت في العقيلة
وهذا رقمهم للتوصيل للمنازل
22056356
مشكورين عالدعوة
Filed under: Food, Food - American, Food - International, sweets Tagged: animal fries, arabic coffee, burger, cheese, fries, karak, قهوة, كرك, مشروم, هندي, امريكي, بيكون, برغر, بطاط, جبن, جباتي, شباتي 
